風雪中的港孩

「滯英學生回港 與家人相擁哭泣」

一早起身睇到哩個新聞標題，我都想喊。


成班溫室港童，配合一班過份保護自己仔女既白痴父母，再加上低能香港政府，完美配搭炮製出一齣鬧劇。

歐洲地區天寒地凍，大風雪隔幾年就有，飛機停飛正常不過，揀得哩啲地方讀書就預左，無人想天氣差，一班後生仔女因為趕唔切返屋企過聖誕，父母就嘈到拆天要政府動用社會資源派幾架包機接佢地返來？香港政府自從上次泰國紅衫軍事件派包機遲左俾人話之後，就次次有事都即刻話派包機，但都要睇下單野合唔合理囉，好似菲律賓人質事件當然要派，全香港無人會鬧，但今次哩單野，稍為有D常識既都知道，成班後生仔喺機場酒店打幾晚地鋪會死咩？如果有啲細路慣左高床軟枕，咪返宿舍等囉。我有幾個歐洲人朋友身處倫敦，都係無機位返老家，佢地連機場都費事去，喺屋企開個skype，同阿爸阿媽講一聲「miss you so much」，然後繼續house party。

就算真係返唔到香港過聖誕，喺英國過聖誕好慘咩？有乜野咁急要返香港呢？老實講，班友仔返到香港，喺屋企食完餐做冬飯，由於時差關係瞓唔著，放低筷子，啖飯都未吞晒就即刻約friend出街玩啦，今次果幾架包機，除左會刺激左羅傑承個新K場嘅生意、蘭桂芳啲酒吧賣多幾打shooter同埋多幾個失身少女，我諗唔到仲有咩意義囉。

本來今次事件，係果班港童學習獨立同埋面對逆境既好機會，但係而家佢地學到既係：有咩事就發爛楂、大聲夾惡、怨天尤人，就可以解決所有事情。

香港傳媒又係攪笑，間機場酒店多幾個人瞓地下就係「集中營」，蘋果仲用日記文體咁寫，寫到荷理活B級災難片劇本咁，話所有人都「人心惶惶」，而家只不過係無得搭飛機返香港咋，唔係第三次世界大戰呀﹗

好喇，咁而家接完英國果班，其他受大風雪影響既歐洲國家都有香港留學生架喎，係咪又派架包機，好似泥鯭的咁兜晒佢地返香港先？如果唔係就好唔公平囉。