關於

這是facebook上的接龍遊戲，要麼沒人tag，要麼就在2天內被6個半人tag了（那半個人是Jac，本來tag了，後來又取消，原因不詳）。

___________________________________________________

Rules: Once you've been tagged, you are supposed to write a note with 16 random things, facts, habits or goals about you. At the end choose 16 people to be tagged. You have to tag the person who tagged you. If I tagged you, its because I want to know more about you.

規則：當你比人tag左，就要寫一篇note，內含16項有關你的事情，習慣，喜好，目標....或任何各不相干但有關你的東西。最後tag另外16個人。你必須tag返tag左你的那個人。如果我tag左你，即係我想認識你更深。

1. 曬極都唔黑，正宗小白臉，試過曬燈，變左蜜糖色好開心，後來聽聞會生皮膚癌，怕死，停左，唔曬2個月又變返白，吹漲，Biotherm如果要sell男仕美白用品，唔使搵金城武，搵我。

2. 硬係鐘意與別不同，周街都係既野我就會唔鐘意，其中一個例子係從未買過converse。

3. 越來越享受自己一個人去戲院睇戲，因為深信睇戲係一種自我交流。果D喺戲院同人傾偈、唔熄電話、甚至講電話既人，係應該受到制裁既。

4. 如果而家我地要讀李白杜甫蘇東玻既詩，一千年後既人類就應該會讀林夕黃偉文林振強既詞。

5. 鐘意食黑朱古力（dark chocolate）。

6. 唔鐘意飲有氣既飲品。BTW，唔明點解汽水唔係叫氣水。

7. 最鐘意既體育隊伍係利物浦，由科拿拍哥利摩亞年代開始鐘意，積極儲錢去歐洲既最大目的其實都係為左去英國睇波。

8. 好proud of自己中文名，因為夠特別。BB果陣親戚幫我改個英文名叫Bottle，因為「樽」同「俊」差唔多音，大個D就叫我John，亦係因為同「俊」字差唔多音，其後自己改英文名，試過叫Michael同Simon，最後升中學就叫左Alex，直到永遠。

9. 好憎人搭地鐵果陣成個身挨落條柱度，條柱係俾人用手扶架，唔係俾你一個人挨架﹗一見到哩D情況，我會毫不猶豫將隻手「攝」入佢背脊同條柱之間，再係咁郁隻手，用手指既關節位係咁頂佢背脊，令佢知難而退。

10. 深信外星人既存在，好想死之前同外星人傾下偈。

11. 非常喜歡做演員。

12. 無宗教信仰。由小學到大學都係讀基督教學校，亦返過教會，去過團契，甚至決志，但最後都無成為一個基督徒，近年開始讀佛理，去書局打書釘時總會睇返幾頁【漫談心經】或【佛理的生活智慧】之類既書。

13. 有異性無人性係人之常情，重色輕友係天經地義。所以如果大家係因為會情人而放我飛機，我係一定唔會鬧你既。

14. 如果一個女仔著住我件衫，無論係咩衫，我會突然覺得佢有一種莫名既吸引力。

15. 幾年前釘左生平第一個耳窿，喺左邊耳門。懶特別又一例子。

16. 其實鐘意戴帽，但因為頭圍太大而好難買到帽。